ଓଡ଼ିଶା ପୋଲିସରେ ୧୧୩ ପଦରେ ପୂର୍ବତନ ପୋଲିସ କର୍ମଚାରୀଙ୍କ ନିଯୁକ୍ତି, SPO ଭାବେ ମିଳିବ ସୁଯୋଗ
କୋରାପୁଟ। ଓଡ଼ିଶା ପୋଲିସର ସାଉଥ ୱେଷ୍ଟର୍ଣ୍ଣ ରେଞ୍ଜ (SWR) ପକ୍ଷରୁ ଅବସରପ୍ରାପ୍ତ ପୋଲିସ ଅଧିକାରୀଙ୍କ ପାଇଁ ଚୁକ୍ତିଭିତ୍ତିକ ନିଯୁକ୍ତିର ସୁଯୋଗ ଦିଆଯାଇଛି। ସହକାରୀ ଉପ-ନିରୀକ୍ଷକ (ASI), ଉପ-ନିରୀକ୍ଷକ (SI) ଏବଂ ଇନ୍ସପେକ୍ଟର ପଦରୁ ଅବସର ନେଇଥିବା ପୋଲିସ କର୍ମଚାରୀଙ୍କଠାରୁ ସ୍ପେଶାଲ ପୋଲିସ ଅଫିସର (SPO) ଭାବେ ୧୧୩ଟି ପଦ ପାଇଁ ଆବେଦନ ଆହ୍ୱାନ କରାଯାଇଛି।
ଏହି ନିଯୁକ୍ତି ଦକ୍ଷିଣ-ପଶ୍ଚିମ ଓଡ଼ିଶାର ୬ଟି ଜିଲ୍ଲାରେ ଖାଲିଥିବା ପଦ ପୂରଣ ପାଇଁ କରାଯିବ। ରାୟଗଡ଼ାରେ ସର୍ବାଧିକ ୨୪ଟି, କୋରାପୁଟରେ ୨୨, ମାଲକାନଗିରିରେ ୨୦, କଳାହାଣ୍ଡିରେ ୧୮, ନବରଙ୍ଗପୁରରେ ୧୬ ଏବଂ ନୂଆପଡ଼ାରେ ୧୩ଟି ପଦ ରହିଛି।
୧୫ ଅକ୍ଟୋବର ଆବେଦନର ଶେଷ ତାରିଖ
ଯୋଗ୍ୟ ପୂର୍ବତନ ପୋଲିସ କର୍ମଚାରୀମାନେ ନିଜର ଆବେଦନପତ୍ର ଡିଆଇଜି, ସାଉଥ ୱେଷ୍ଟର୍ଣ୍ଣ ରେଞ୍ଜ, କୋରାପୁଟଙ୍କ କାର୍ଯ୍ୟାଳୟରେ ଦାଖଲ କରିପାରିବେ। ଆବେଦନପତ୍ର ୧୫ ଅକ୍ଟୋବର ୨୦୨୬ ସନ୍ଧ୍ୟା ୫ଟା ୩୦ ସୁଦ୍ଧା ପହଞ୍ଚିବା ଆବଶ୍ୟକ।
ଆବେଦକ ଓଡ଼ିଶାର ସ୍ଥାୟୀ ବାସିନ୍ଦା ହୋଇଥିବା ସହ ବିଜ୍ଞପ୍ତି ପ୍ରକାଶ ତାରିଖ ସୁଦ୍ଧା ତାଙ୍କ ବୟସ ୬୫ ବର୍ଷରୁ ଅଧିକ ହୋଇନଥିବା ଆବଶ୍ୟକ। ଏଥିସହ ଓଡ଼ିଆ ଭାଷା କହିବା, ପଢ଼ିବା ଓ ଲେଖିବାରେ ଦକ୍ଷତା ରହିବା ଦରକାର। ପ୍ରାର୍ଥୀଙ୍କ ସେବା ରେକର୍ଡ ନିର୍ଦ୍ଦୋଷ ହେବା ସହ ତାଙ୍କ ବିରୋଧରେ କୌଣସି ଅପରାଧିକ ମାମଲା ରହିନଥିବା ଆବଶ୍ୟକ।
୨୮ ଅକ୍ଟୋବରରେ ଚୟନ ପରୀକ୍ଷା
ସର୍ଟଲିଷ୍ଟ ହୋଇଥିବା ପ୍ରାର୍ଥୀଙ୍କ ଚୟନ ପରୀକ୍ଷା ୨୮ ଅକ୍ଟୋବର ୨୦୨୬ ସକାଳ ୬ଟା ୩୦ରେ କୋରାପୁଟ ରିଜର୍ଭ ପୋଲିସ ଗ୍ରାଉଣ୍ଡରେ ଅନୁଷ୍ଠିତ ହେବ। ଏଥିରେ ମୂଳ ପ୍ରମାଣପତ୍ର ଯାଞ୍ଚ, ମେଡିକାଲ ପରୀକ୍ଷା, ଶାରୀରିକ ପରୀକ୍ଷା ଓ ସାକ୍ଷାତକାର ରହିବ।
ଶାରୀରିକ ପରୀକ୍ଷାରେ ପ୍ରାର୍ଥୀଙ୍କୁ ୧ ଘଣ୍ଟା ମଧ୍ୟରେ ୫ କିଲୋମିଟର ଚାଲି ପୂରଣ କରିବାକୁ ପଡ଼ିବ। ନିର୍ଦ୍ଧାରିତ ସମୟରେ ଦୂରତା ପୂରଣ କରିପାରିନଥିବା ପ୍ରାର୍ଥୀ ଅଯୋଗ୍ୟ ବିବେଚିତ ହେବେ।
ଚୟନିତ ଅଧିକାରୀଙ୍କୁ ୧ ବର୍ଷ ପାଇଁ ଚୁକ୍ତିଭିତ୍ତିକ ଭାବେ ପୁନଃ ନିଯୁକ୍ତ କରାଯିବ। ନିର୍ଦ୍ଧାରିତ ପୋଲିସ ୟୁନିଫର୍ମ ଓ ବ୍ୟାଜ୍ ପିନ୍ଧିବା ବାଧ୍ୟତାମୂଳକ ରହିବ। ଓଡ଼ିଶା ସରକାରଙ୍କ ଅର୍ଥ ବିଭାଗର ନିର୍ଦ୍ଦେଶ ଅନୁସାରେ ମାନଦେୟ ପ୍ରଦାନ କରାଯିବ।
ଇଚ୍ଛୁକ ପ୍ରାର୍ଥୀମାନେ ଆବେଦନପତ୍ର ଓ ବିସ୍ତୃତ ବିଜ୍ଞପ୍ତି ଓଡ଼ିଶା ପୋଲିସର ଅଧିକୃତ ୱେବସାଇଟରୁ ଡାଉନଲୋଡ୍ କରିପାରିବେ।
